दिवस सहावा : २ सप्टेंबर २०२१, एलाफांसोस : दक्षिण ग्रीस मधील सुंदर बेट
निवांतपणे उठून आवरून दक्षिणेस निघालो. एलाफांसोस नावाच्या बेटावर बीच वर दिवस घालवणार होतो. वासिलीस ने पुन्हा चालकाची आणि मी DJ ची जबाबदारी घेतली. पुन्हा डोंगराळ असा घाटरस्ता होता. मात्र या रस्त्यावर गाड्यांची वर्दळ दिसत होती.
सुंदर विहंगम असे काही दिसताच गाडी थांबवून फोटो काढत पुढे जात राहिलो. एलाफांसोस ला जाण्यासाठी फेरीबोट घ्यावी लागते. त्याच्या रांगेत जवळपास एक तास गेला. फेरीतून दिसणारे बेट फारच सुंदर दिसत होते.
 |
| फेरीतून दिसणारा निळाशार समुद्र |
फेरीमध्ये अर्थातच गाडी नेली होती. गाडीने सिमोसा नावाच्या बीच वर गेलो. हा बीच नितांतसुंदर आहे. निळेशार स्वच्छ पाणी , समुद्राचा तळ दिसेल इतके पारदर्शक पाणी आणि पांढऱ्या रेतीचा ऐसपैस किनारा. सावली देणारीएक मोठ्ठी छत्री आम्ही त्या दिवसापुरती भाड्याने घेतली. खाण्या पिण्याच्या ऑर्डरी देऊन आम्ही आराम खुर्च्यांत पसरलो. बीचवर सूर्यस्नान , समुद्रात पोहणे आणि खाणे- पिणे , या गोष्टी एका पाठोपाठ एक करत राहिलो. नाथन ने आणलेले स्नॉर्केल वापरुन समुद्राखालील जग बघण्याचाही प्रयत्न करुन झाला. मात्र त्या सागरी परिसरात फारसे मासे वगैरे नसल्याने समुद्री वनस्पती पाहूनच समाधान करुन घेतले.
 |
| सिमोसा येथील बीच |
बीचवर दूरपर्यंत वॉक साठी गेलो. पाण्यात मनसोक्त पोहलो. सूर्यास्ताच्या वेळी बीच वर योगासने केली. माझी व नाथन ची बीच वर तारे बघत आणि गप्पा मारत रात्रभर थांबण्याची इच्छा होती. वासिलीस आमच्यासाठी हो म्हणाला. बीचपासून जवळ असलेल्या गावात जाऊन आम्ही रात्रीच्या खाण्या पिण्याची आणि सकाळच्या नाश्त्याची सोय केली आणि एका हॉटेल मधे रात्रीचे जेवण केले.
 |
| बीच योगा |
चांगला अंधार पडल्यावर बीच वर परतलो आणि आमची भट्टी जमली. गाडीतून आणलेली गिटार, त्यावर कसरत करणारी नाथन ची बोटे, वासिलीस गात असलेली सुरेल गाणी आणि अधूनमधून थिरकणारे आमचे पाय , यांनी एक माहोल बनला. संगीतविषयक द्न्यान त्या दोघांनाही बरेच असल्याने माझ्या ज्ञानात भर पडत होती. नाथन ला एखादे गाणे ऐकवल्यास तो काही मिनिटांतच त्याची मेलडी गिटार वर वाजवू शकत होता. त्यांनी पाश्चात्य संगीत आणि भारतीय संगीत यांच्यामधील सांगडही छान घालून दाखवली.
आकाश कालच्या तुलनेने काहीसे ढगाळ असल्याने म्हणावे तितके तारे दिसत नव्हते. मात्र आम्ही निग्रहाने जागे राहिलो होतो. ताऱ्यांचे दर्शन झाल्यावरच आम्ही झोपेची आराधना सुरु केली. वारा मस्त वाहत होता आणि आम्हाला जणू जोजवत होता. तारे बघता बघता कधी झोप लागली कळलेच नाही.
दिवस सातवा : ३ सप्टेंबर २०२१, अथेन्स मधील अखेरची संध्या
बीच वर जाग आली तेव्हा कळले की वासिलीस त्याच्या आरामखुर्चीत नाहीये.
पहाटे च्या वेळेचा सिमोसा चा समुद्र किनारा
नाथन ला उठवून आम्ही समुद्रात डुबकी मारुन फ्रेश झालो. परत गाडीकडे गेल्यावर समजले की थंडीमुळे वासिलीस रात्रीच गाडीत येऊन झोपला होता.
गावातील एका बेकरीमधे ताजे ग्रीक केक्स खाऊन आम्ही फेरी मधे शिरलो. गाडीच्या बाहेर जाऊन हवा खाण्याचा आता मूड नव्हता. Airbnb मधे येऊन आंघोळी करुन आम्ही अथेन्स ला निघालो. वाटेत कोल्डकॉफी झाली. जेवणासाठी एका फूड कोर्ट ला भेट दिली.
अथेन्स ला परत जाताना परत डोंगराळ घाटरस्ता रस्ता आणि विविध ऐतिहासिक नावांची शहरे ओलांडली. वासिलीसशी गप्पांमधून बरीच माहिती मिळत होती.
ऑलिंपिक, होमर या कवीचे गाव, हर्क्युलसच्या साहसकथांशी निगडीत गावे , सगळे बघणे शक्य नव्हते. त्यासाठी ग्रीस मधेच जन्म घ्यावा लागेल.
टळटळीत दुपारी अथेन्स मधे पोचलो. वासिलीस च्या प्रेयसीने आमचे स्वागत केले. नाथन व मी तास दोन तास विश्रांती घेतली. संध्याकाळी आठ वाजता कोस्तास नावाच्या एका मित्राला भेटायला शहरच्या मध्यवर्ती भागात गेलो. सार्वजनिक वाहतूक तितकिशी सोपी नाही हे समजले. बस साठीची तिकिटे छोट्या दुकानांतून घ्यावी लागतात, Uber सारखे ॲप चालत नाही , आम्ही वासिलीस च्या कार वर किती अवलंबून होतो ते समजले. बस स्टॉप वरील दोन तरुणांनी आमच्यासाठी त्यांच्या ॲप मधून टॅक्सी मागवली. सुदैवाने रोख पैसे देण्याची सोय होती.
शहरातील गजबजलेल्या भागात जाताच आम्हाला आम्ही पर्यटक असल्याची पुनर्जाणीव झाली आणि आम्ही काही स्मरणिका खरेदी केल्या.
कोस्तास ठरलेल्या वेळी नियोजित ठिकाणी आला. सोशल हॅकर्स ॲकॅडमी चा शिक्षणाधिकारी असलेल्या कोस्तास शी " हॅक युअर फ्युचर" साठी स्वयंसेवकम्हणून काम करताना ऑनलाईन बराचसा संपर्क झालेला होता. आम्ही दोघेही निर्वासितांच्या संगणक शिक्षणासाठी काम करत असल्याने आम्हाला बोलायला विषय खूप होते. नाथनही संगणक क्षेत्रात काम करत असल्याने तोही आमच्या संभाषणात हिरिरीने सहभाग घेत होता.
 |
| नाथन आणि कोस्तास बरोबर अथेन्स मध्ये |
रात्री आईस्क्रीम खाण्यासाठी पुन्हा वासिलीस ला भेटलो आणि सहलीतील खास क्षणांची उजळणी केली.
 |
| मारिया, वासिलीस , नाथन आणि मी |
वासिलीस मुळे एक अस्सल ग्रीक सहल सहज पार पडली होती. ग्रीसमधील फारशा माहीत नसणाऱ्या ठिकाणांना भेटी देता आल्या होत्या. कंपनीतील सहकाऱ्यांचे मित्रांत रुपांतर झाले होते.
(समाप्त)
