देवांच्या देशात ("ग्रीस"हल) : मोनेमवासिया , एक अनोखा द्वीपकल्पीय दुर्ग

दिवस पाचवा : १ सप्टेंबर २०२१, मोनेमवासिया, एक अनोखा द्वीपकल्पीय दुर्ग

सकाळी लवकर उठून आवरुन ग्रीस च्या दक्षिणेस मार्गक्रमण केले. वाटेत पेट्रोल, कॉफी असे थांबे झाले.
त्रिपोली नावाच्या गावी एक चालकाला (म्हणजे वासिलीस ला) विश्रांतीसाठी मोठा ब्रेक घेतला.
माझ्याकडे गाडी चालवण्यासाठी परवाना असला तरी परवानगी नव्हती. वासिलीस च्या बाबांनी त्याला फक्त तूच गाडी चालव अशी ताकीद दिली होती. मी आणि नाथन गाणी लावत आणि गप्पा मारत त्याचे मनोरंजन करत होतो.
एका फूड कोर्ट पाशी ब्रेक घेऊन आम्ही काही स्थानिक खाऊ खाल्ला आणि भरुन घेतला.

फूड कोर्ट चे टेरेस 

चिक्की सारख्या वेगवेगळ्या चवीच्या वड्या विशेष चविष्ट होत्या. फावा नावाची तुरीच्या डाळीसारखी दिसणारी एक डाळ वासिलीस ने दाखवून त्यापासून ग्रीक रेसिपी कशी करतात ते सांगितले.

मोनेमवासिया ला जाण्यासाठी गुगल बाबांनी दाखवलेला रस्ता बराच डोंगराळ होता. घाटातून जाताना वासिलीस चे चालक कौशल्य दिसत होते. अवघड वळणांच्या या रस्त्यावर एकही गाडी आमच्या गाडीच्या मागे अथवा पुढे दिसली नाही, त्यामुळे काही वेळा रस्ता चुकलो की काय अशी शंकेची पाल चुकचुकली. मात्र सुदैवाने तसे झाले नाही.
मजल दरमजल करत आम्ही आमच्या AirBnb घरी पोचलो. हे घर मोनेमवासिया पासून अगदी पाच मिनिटांच्या अंतरावर होते. तेथे बॅगा ठेवून आणि आंघोळी करुन आम्ही थेट मोनेमवासिया द्वीपकल्पावर वर निघालो.

मोनेमवासिया द्वीपकल्पीय दुर्ग

एका मोठ्ठया टेकडीवर बांधलेला रेखीव जलदुर्ग म्हणजे मोनेमवासिया होय. अंदाजे ३००-४०० मीटर उंचीचा हा किल्ला समुद्री चाच्यांपासून संरक्षण व्हावे म्हणून बांधला गेला होता.

किल्ल्यावर जायची वाट पूर्ण दगडी होती. किल्ल्याच्याच दगडी बांधकामात सामावून घेतलेली अनेक छोटी मोठी दुकाने , हॉटेल्स,
सुरुवातीला दिसली. त्यांत नुसते डोकावून आम्ही वर जात राहिलो. वासिलीस ला तिथे कोणीतरी मित्र भेटल्याने त्याच्या ओळखीतून एका चांगल्या हॉटेलची शिफारस मिळाली.
किल्ल्यावर जाणारी वाट बरीच वळणावळणाची असली तरी फोटो काढत काढत जात असल्याने आपोआप थांबे मिळत होते.
वाटेत जागोजागी आणि तिथे असलेल्या घरांच्या अंगणात भले मोठ्ठे रांजण दिसत होते. वासिलीस ला विचारले असता मूळचे क्रेटा च्या बेटावर बनवले जाणारे हे रांजण ग्रीसच्या अनेक भागांत धान्यधुन्य साठवण्यासाठी वापरले जातात असे समजले.

किल्ल्यावरून दिसणारे एक दृश्य 

अर्ध्या तासात आम्ही किल्ल्याच्या माथ्यावर पोचलो. किल्ल्याची जुजबी माहिती घेऊन काही अवशेष बघितले. तटबंदी आणि कडे जरासे धडकी भरवणारे होते. किल्ल्याच्या पायथ्याशी वसलेली छोटी वस्ती एकदम चित्रातल्यासारखी मांडून ठेवलेली वाटत होती.

मोनेमवासिया च्या पायथ्याचे गाव  

सूर्यास्त होईपर्यंत माथ्यावर थांबून मग आम्ही खाली उतरायला सुरुवात केली.
पायथ्याशी गावात वासिलीस च्या मित्राच्या हॉटेलमधे गेलो. हे हॉटेल अगदी दगडी बांधकामातील होते. गुहेसदृश दिसणाऱ्या एका कोपऱ्यात आम्ही टेबल निवडले. खास ग्रीक पदार्थांवर ताव मारला.

डेझर्ट सारखे दिसणारे ग्रीक सॅलड  आणि आईस्क्रीम सारखे दिसणारे हुमूस चे गोळे 

त्यानंतर त्या हॉटेलसमोरच असलेल्या रूफ टॉप कॉकटेल बार मधे गेलो.
तेथून रात्रीचा समुद्र सुंदर दिसत होता. कॉकटेलच्या घुटक्यांसोबत गप्पांना रंग चढत होता. परत घरी येताना (आकाशात) तारे दिसत होते. किल्ल्याच्या पायथ्याशी आजिबात च दिवे नसल्याने आकाशदेखावा ताऱ्यांनी बहरून गेला होता. आकाशगंगा देखील उघड्या डोळ्यांना दिसत होती.

आकाशगंगेला milky way का म्हणतात याची एक रोचक कथा ग्रीक पुराणात आहे :
हर्क्युलस च्या सावत्र आईला (हीरा ला) त्याचा राग होता त्यामुळे तिने त्याला अंगावर पाजायला नकार दिला होता. मात्र हर्क्युलस बाळ असतानाही एकदम शक्तिशाली होता. त्याने म्हणे एका रात्री बेसावध क्षणी हीरा चे स्तन इतक्या जोरात पिळले की त्यांतून दुधाच्या चिळकांड्या उडाल्या. या दुधापासून तयार झाली ती milky way.

या आणि अशा ग्रीक पौराणिक कथा ऐकवत ऐकत आम्ही AirBnb मधे पोचलो आणि दुसऱ्यादिवशी गजर न लावता उठायचे असे ठरवून ताणून दिली.

( क्रमशः )